الإثنين , يناير 23 2017
أخبار عاجلة
الرئيسية / تعلم تداول الفوركس / فن لعب إدارة رأس المال ( الجزأ الثالث )

فن لعب إدارة رأس المال ( الجزأ الثالث )

1,601,681 total views, 525 views today

3 0 0 0 0

فن لعب إدارة رأس المال ( الجزأ الثالث )

بسم الله الرحمن الرحيم
و الصلاه و السلام على اشرف الخلق سيدنا محمد صلى الله عليه و سلم

فن لعب إدارة رأس المال ( الجزأ الثالث )

فن لعب إدارة رأس المال ( الجزأ الثالث )

اتكلمنا فى اول جزء و عرفنا يعني ايه راس المال و خواصه و فى تاني جزء عرفنا يعني ايه مرونه مع السوق و الاستراتيجيات النهارده بقى هنتكلم على جزء ممكن ميكونش كبير اوي لكنه كبير مقاما بمعنى ايه

المتاجر او التجاره عامه كانوا زمان بيقولوا لينا كده التجاره مكسب و خساره ده مبدأ لازم كل متاجر و كل مغامر يعرفه و الاهم انه يلتزم بيه كويس اوييعني حضرتك لو خسرت مبلغ من المال اى كان هو فى سبيل التجاره او المتاجره فى اسواق المال لازم نفهم انك كسبت من وراه حاجه تانيه مش شرط انها فلوس لا بس ممكن تكون خبره ممكن طريقه ممكن اسلوب عمل المهم انك خسرت فلوس فى مقابل حاجه معنويه و ليست ماديه

طيب الكلام ده جميل و ظريف و نظرى و كلام كتب لكن الفعلى ان الانسان لما بيخسر فلوس بيتأثر نفسيا الى :

1- خسران و محبط و عايز يقوم و يجرى و يسيب السوق
2- خسران و عنيد و عايز ياخد من السوق اللى السوق خده منه فى دقايق و يعوض خسارته
3- خسران بس عاقل

لو حضرتك معاك 1000 دولار فى حسابك و خسرت فى صفقه ما 50 دولار اصبح حسابك 950 دولار هل هتتقبلهم و لا هتبقى انه نوع ؟

هنمسك النوع الاول اولا و نحلله :
حضرتك بمجرد ما شفت الخساره فى حسابك الحقيقي اقتنعت تماما انك خاسر و فاشل فى السوق لا و ايه و مانتش نافع فى اى حاجه و هتلاقى بقى كلام الوالد و الوالده بيتكرر فى ودنك اللى كان بيحصل زمان ايام المدرسه و هم بيقولولك انت مش نافع و قابلنى لو فلحت هيجيلك فى نفسيتك كده قرار انك مش نافع فى السوق ده و السوق ده اكبر منك بمراحل و انك اسلم حل ليك تجري و تبعد عن السوق ده اللى هيخسرك كل ال1000 دولار عاجلا ام اجلا يبقى الحل الفورى و السريع الهروب و اجرررررررررررررررى يا باشا و الحق باقى الفلوس قبل ما تضيع فى الحساب و تقفل الشارت و باي بايساعتها انا هاقولك انا اسف انت ملكش مكان هنا و لا هتنفع هنا و بجد ارحل عن هذا السوق و اى سوق راس مالى تاني

طيب و النوع التاني :

ده بقى الصايع اول لما خسر قالك لا انا ميتعملش معايا كده ابدا انا لازم اخد اللى السوق اخده منى طيب ازاى يا عمنا هتاخد الخساره ده تاني هاعمل صفقه عكسى على طول و اضاعف و اعزز واعمل و اسوي طيب و ماله اعمل اللى انت عايزه بس على رهان انك فى خلال يومين هتلاقى المارجن كول داخلك بيقولك مساء الخير يا فندم ممكن ازور حسابك ؟و برده ساعتها هاقدر اقولك انا اسف انت مكانك مش هنا خالص لان السوق هنا كبير و انت مهما طلعت و مهما نزلت مش اده بالعكس انت اقل منه بكتيييييير

طيب و النوع التالت :

النوع ده بقى انا عن نفسي اخلع له القبعه احتراما و اقوله ياريت ابقى زيك تماما
طيب ليه ؟

لان الراجل ده قبل ما يدخل السوق اصلا سيان خسر او كسب بس هو فاهم يعني ايه سوق مال و بالاخص يعني ايه فوركس

طيب هو الفوركس اصلا له تعريف و معنى ؟ 

طبعا له تعريف و معنى و افتكر دايما زمان كانوا بيقولونا و احنا صغيرين ” اعرف عدوك كويس قبل ما تخوض معاه اى معركه و لو بالكلام “يعني معنى كده اننا محتاجين الاول نفهم مين هو عدونا او مين هو السوق اللى احنا داخلين عليه اساسا و ايه هى المفاهيم الاساسيه اللى موجوده فى السوق ده و لازم نلتزم بها التزام صارم و جاد من غير اى دلع او تهاون فيها

اولا السوق ده عباره 3-5 تريليون دولار تداول يومي يعني ايه ؟
يعني حضرتك فى مستثمرين بيعملوا عمليات بيع و شرا يوميا بفلوس تتراوح بين 3-5 تريليون دولار يومي يعنى ناس راكبه عربيات سريعهخ و بتجري فى سوق سريع اصلا يعني حضرتك لو راس مالك 100.000 و لا حتى مليون دولار برده يعتبر زي عربيه مهكعه موديل السبعينات داخله فى سباق مع عربيات حديثه فساعتها قدامك حل من اتنين مالهومش تالت يا اما تبيع العربيه ده و تجيب عربيه تانيه سريعه و حديثه و ده معناه انك تزود راس مالك عن كده و ده مستحيل طبعا يا اما تستخدم عقلك و فكرك و تفكر ازاى تلعب مع الناس ده صح مش عشان تسبقهم و خلاص لا عشان تمشي بس معاهم فى التيار لانهم كلهم لو جريوا فى وقت واحد انت هتتفرم فى النص

ثانيا السوق ده مقابل لكل كاسب واحد قدامه خسر

يعني حضرتك لو كسبت النهارده 10 نقط كون متأكد ان فى حد قدامك خسرهم و ده مبدأ التجاره اصلا السوق مكسب و خساره و طبعا العكس صحيح يعني معنى كده انك هتكسب و تخسر و فى ناس قدامك هتخسر و تكسب و الناس ده عايزه تعوض برده زيك يعني خلى بالك من الغدر فى اي وقت

ثالثا السوق ده مخاطرته عاليه و مكسبه عالى برده

فى مقوله اقتصاديه دايما ثابته و بتقول كل ما المخاطره تعلى كل ما المكسب يعلى بالبلدي كده لو انت دخلت فى مشروع و خاطرت و غامرت بمبلغ 1000 جنيه اكيد مكسبه مش هيكون اد مكسب مشروع انت مغامر فيه ب مليون يعني حضرتك كل ما تعلى حجم عقودك و تكتر صفقاتك كل ما احتمال الخساره بيكون اكبر مش اقل يعني عشان تعوض لازم تأمن نفسك من الخساره مش تكبر العقود و السلام

من كل الكلام ده نستنتج ان السوق ده مفرمه لو ماتعملتش معاه بحذر هيفرمك و لو مأمنتش نفسك من الخساره هتطمع فى المكسب و لو مخدتش بالك من اللى حواليك خسرت كل مالديك

ييجي بقى صاحبنا بتاع النوع التالت هو فاهم اصلا الكلام ده قبل ما يدخل السوق عشان كده اول ما خسر وقف و قال لا انا لازم افهم الاول انا خسرت ليه
ده المهم و ده السؤال الصح انا خسرت لييه ؟؟؟؟؟
مش مهم حاليا انا خسرت كام المهم ليه
و يفضل يدور على السبب لحد ما يوصله و بعد ما يوصله هيجرب تاني و ساعتها احتمال خسارته هيقل لانه عرف السبب اللى خسره المره الاولى بالتالى لو خسر تاني هيكون عشان سبب جديد
عشان كده اغلب المتاجرين فى السوق ده القدماء يقولك انت لو ماشي صح هتخسر اول حساب لايف
طب ما هو عنده حق لانك هتخسر اول حساب بس مكانه هتاخد خبره السوق يعني بالبلدى دفعت فلوس عشان تتعلم صح

و من كل الكلام الظريف ده نقول اننا اتكلمنا على نقطه يجهلها الكثيرون و هى سيكولوجيه السوق و المضارب فالسوق له روح بتنبض و لازم المتاجر يفهمها قبل ما يدخل السوق كمان لازم المضارب يفهم روحه و نفسه و يعرف نفسيته كويس قبل ما يتاجر عشان يقدر يتحكم فى نفسه النوع الاول و التانى اتأثروا بالنفسيه سيان مغامر او مسالم اما النوع التالت فاتأثر بالعقل و ده المطلوب فى سوقنا او اى سوق راس مالى

العقل ثم العقل ثم العقل و ننسى العواطف و المشاعر و النفسويات تماما لانها لا مجال لها و هتكون سبب فى خسارتك قبل سبب مكسبك

اخر حاجه فى موضوع النفسيه ده غير تقبل الخساره هو مقدار الخساره
يعني حضرتك قبل الصفقه اسأل نفسك انا هاقدر استحمل خساره كام ؟
50-100-150 اى كان المبلغ المهم انى ابقى مكيف نفسي على خسارته مش على المكسب اللى جاي من وراه

يعني حضرتك تقول انا هاتحمل خساره 50 دولار بس مش تقول انا لو خسرت 50 دولار مقابلهم هاكسب 100 لان ساعتها مش هتلاقى غير ال50 الخساره فقط

الخلاصه :
نفسيه المتاجر و السوق علم لا ينتهى و لكن كل ما يلزمنا فى هذا العالم هو ما تكلمنا عنه لذلك وجب على المتاجر قبل الدخول فى السوق معرفه مقدار الخساره المتحمل لنفسيته و عقله و قدرته العقليه قبل اى دخول فى اسواق المال

ودي و تقديري للجميع و لسه للحديث بقيه و الله المستعان

لمتابعه الموضوع و الاراء و لوجود اى نقاش برجاء الدخول على رابط الموضوع على الرابط التالى فى المنتدى
http://goo.gl/MJqfHG

961 total views, 1 views today

عن Ahmed Gharib

Loading Facebook Comments ...

اضف رد

لن يتم نشر البريد الإلكتروني . الحقول المطلوبة مشار لها بـ *

*

Facebook

Twitter

YouTube